CLICK HERE FOR THOUSANDS OF FREE BLOGGER TEMPLATES »

Monday, November 19, 2007

مقروده ..؟؟؟؟

طبعا خلصت امتحاناتي الحمدلله بعد ماا قطعت فتره وايد كبيره عن النت واللابتوب والبلوق

اشكر كل الي ردو على بوست الشعر وهذا من ذوقكم



ودي اقولكم سالفه

انا دايما كنت اقول ان عندي الحاسه السادسه وان عندي احساس قوي بالي راح يصير بعد شوي يعني في اكثر من موقف حصل لي بس للاسف كلهم ما يبشرون بالخير بس بعد شسوي هذا الي صار اكتشفت ان عندي حدس بالقراده


مثلا يعني

اذكر قبل كنا في بيت جدي ومتجمعين وكان وقت عشا وكنا قاعدين كلنا تحت بالصاله ومستانسين لان مر اسبوع على عرس خالي وتجمعنا نبي نشوف فيديو العرس والصور ومسوين يعني استقبال .. المهم قبل العشا حسيت وو جا على بالي شكل الصاله في الطابق الثاني محترقه مادرييييييييي ليش الصوره مرت علي قلت اعوذ بالله
والله بعد العشا على طول ما تشوووف الا ذاك الدخاااااااان الي نازل من السلم من فووووووق وريييحه النار والدخاان وحريييييييقه فضييييييعه احترق البيت كللللله كلللللله من فوق ودقينا على 777 و طلعنا ورحنا حق بيت جيرنهم والله كان يوم لا نسىىى حتى اذكر من الخوف والروعه ما نمت بداري رحت نمت عند امي بس الحمدلله عدت على خير كانت خساير ماديه بس الحمدلله

هذا الموقف الاول

اما الموقف الثاني

اهوا لما كنت عند بيت رفيجة اختي وهم نفس الشي مسوين عشا بس هالمره بس جذي جمعه
المهم الناس انا ماعرفهم حيل بس اعرف رفيجة اختي اما الباقي سلمت عليهم وقعدت اسولف معاهم
المهم مادري ليش حطيت عيني على بنت وحطيت عيني الثانيه على بنت هم ثانيه وجت الصوره في بالي على طووووول ... شفت في بالي ان هالبنتين ماسكين شعر بعض ويطقون بعض طق وكل وحده تعلي صوتها وتسب الثانيه .. جان اقول اعوذ
بالله
وانا من اقول اعوذ بالله يعني صاررت بعد ما تعشينا ماسمع الا الصراخ بالغرفه الثانيه ولا الثنتين فوق بعض وطقققققققققق والله العظيم ما ازل عليكم بكلمه انا قمت اخاف من نفسي والله طبعا هدينا الوضع وقلنا حقهم يهدوون وزعلت وحده وطلعت من البيت والثانيه طايحه زف فيها


ماعلينا

الموقف الثالث

طبعا هذي تحصل معاي بشكل متكرر ... انا مو ملتزمه وايد بحضور محاضراتي .. غاااالبا ما تصير معاي ان الوقت الي اداوم فيه قبل لا ادش الكلاس تجيني صوره ان القاعه فاضيه مافيها احد واول ما اوصل عند الباب القا الدكتور معتذررررر ومافي طلبه ولا هم يحزنون
وهذي قازره علي كل مره تصير معاي

الموقف الرابع وهو احدث واحد يوم امس
كان علي امتحان ودرست دراسة مو عاديه والماده احبها ومستانسه فيها وسهله وسلسه وعزلت نفسي وحرمت نفسي من عرس خواتي كلهم راحو له وانا قلت لاااااااا ماني رايحه بقعد ادرس خلاص اعقلي امتحان مو لعبه ويعني شاده حيلي وسهرانه على الحفظ وخليت اختي تفهمني وناديت اخوي قلتله انت تفهم بالسياسه امتحاني سياسي وتكلف الريال وشرحلي واستعديت خلاص
على اساس ان امتحاني الساعه 12 الظهر وهوا وقت محاضرتي
رحت حق الكليه جتني عاد ذيك الصوره الي قمت اقول الله لا يحيييها ما شفت الا ان القاعه فاضيه ؟؟ قلت ها شنو؟؟ اعوذ بالله واحد ثنين ثلاثه ولا اقرب صوب القاعه وقلبي يرقع شوي ولا ما في احد؟؟ ها؟ وينهم؟ وادق على بنت واقولها خير وين الامتحان جان تقول وييي وينج انتي امتحنا وخلصنا من الساعه 10 .. جان اقول خير خير مشكورررررره واسكر التلفون

واختم على وجهي كلمة مقروده مقروده مقروده بالثلاث






هذي بعض المواقف الي احس فيها ودايما تطلع مو في صالحي بس الحمدلله والشكر على كل حال وهالشي كان يضيق خلقي بس مع الايام قمت استانس عليه وكل مايصير معاي موقف احس فيه ويصير اقوم اضحك ضحك هستيري واستانسسس مادري ليش ادري اني متروعه من داخل وخايفه بس وجهي يعبر بضحكه هالكبررر

وهالشي يذكرني بقصه صغيره بس حرام تكسر الخاطر صراحه

واحد قعد من غيبوبته بعد سنتين ولقى زوجته عنده بالمستشفى قاعده


جان يقولها يا حبيبتي انتي اهني قاعده عندي


صارلي سنتين مرقد بالمستشفى وقبل لا اطيح بغيبوبه كنتي عندي


وبعد سنتين اصحى القاج انتي عندي




والمسكينه تهز راسها وتدمع عيونها



جان يقولها : ياحبيبتي ما تخليتي عني حتى لما سويت حدث بالسياره ...ونقلوني المستشفى .... كنتي معاي ....




ولما احترقت سيارتي..... كنت معاي ما هديتني


وتهز الزوجه راسها وتدمع

قالها يا حبيبتي ماخليتيني حتى لما توفى ابوي


واحترقت الشقه كنتي بجابني .... ومعاي



وتاثرت حيل وقامت تدمع اكثر واكثر


جان يقولها حبيبتي

معاي حتى لما خسرت املاكي وفلوسي ما فكرتي تهديني




ومعاي وليلحين عندي

وتهز الزوجه راسها


قالها الزوج



حبيبتي ..... اقلبي وجهج ...... انتي وجهه نحس علي


يالمقروده




يالمنحوسه




وزفففففففف فيها






يعني مسكينه شنو ذنبها
الله يعينها

المهم بالموضوع


هل فعلا في شي اسمه حاسه سادسه وحدس ؟؟
و دايم نسمع فلان نحس
فلان وجهه حلو علي
هل هي عبارات مجازية يعني كلام وخذ وخل




ولا لها أصل وتأثير؟؟؟؟؟؟؟







Friday, November 9, 2007

بدايــه من اشعــاري

اشكر كل من اهتم بالبوست الي طاف .. وآرائكم كلها (على راسي) واتمنى انكم استفدتو شي ولو بالبسيط

اليوم ودي اكتب لكم شعر .. واحب ابدي بقصيده من قصايدي الي انا ألفتها وكتبتها .. واهي تحمل معاني وايد كبيره بالنسبة لي لاني عشت هالقصه وحبيت اشرحها عن طريق ابياتي الشعريه واتمنى انها تعجبكم .. انا ما عجبتني كثر ما عورت قلبي هذي مشاعر حسيت فيها :)

اقروها وعطوني رايكم .. وقولو شنو الي عجبكم فيها وشنو انتقادكم لها




( غـــصــة )

غصــــة في قلبي .. ذقتــها يومـــك اقــفيـت



عــيت تروح .. وحالــفه مـــا اعـــديـــها





الحــين يوم اني عــــلى الحـــب كــفـــيــت





انــهــيت قصــه مــا مــداك تـــبديـــهـــــــا







أجـــــــل يــوم ان بــخواطــــرك رديــت



لـــــــــيه اتــعنـا تفـــسرها وتحـــكيــــها؟؟





وأنا على النـيــه فـيـك رحــبت وحــييـــت



مــاكنــــت خـابـرتك فعـــــلا تســويـها







جيتك على كـــــــيفك.. عطيت ومديــت



وارهنـــت لك روحـي ودي تخــــاويـها





نــاديــتني واقبـلــتــ لـك فزيـت وهليـت



حــــتى جروحــك ما تكـاثرت اداويـها







!!اذكـر اجــي كل ما حســيت وحنـيـــت



!!واذكــــر تقــول يا ناس احبـها واغليــها





وهـــي غايــتي ما قبلــها قد ولبـــيــت



كــــل العطـــــايــا تـــفديها وتبليــــــها







وارتــحت لـي يعــني ،،يعـنـني حــبيت



وتقـــول في نفســـك بكــــره اخلــــيها





ليتـــك قـــبل مارحت عـني وصــديت



فــــكــرت بــالـــي مـا تفــكر تــلاقـــيها







وادركـــتني كـل ما علــى البـال مريــت



صـعبه علــي، وشـلون مثـلي تعديـها ؟؟





ضيقــت خلـقي ومـنك بالحـيل مليــــت



الله حســـيبك بـس دام هــذي تــــــاليـها







جـانك على نبـض الاحسـايــس اقســيت



وانــــا بطــــباعي ما تعــــودت أعنــيها





والله مــــدري لــيه وقـــفت وعييـــــت ؟؟



وحلفت انـــي لـــك ماراح اعديــــــــها؟؟







يـــــاخـــي خسـاره فيــك كل ما تعنــيت



روح وتـــوكل عــــسى الله يمشيـــــــــها





مــــاني نصـيبك وخيــرتي يومـك اقفيـــت



قرصــــــت نفـــــــسي من امثـــالك تجـاريها





ماعــــــــقـب هذا الوقـــت بــــقول ياليــــت



بصـــــبر وروحي اليــوم ربك يراضيها











وسلامتكم








Saturday, November 3, 2007

احذر من عدوك مره .. ومن صديقك الف مره ..؟؟؟





اليوم مادري ليش قعدت اتامل بكلمة قريتها في بلوق الاخ محمد



كاتب بوست ان دكتورته قالتله ان حال الصداقه والاصدقاء مثل حال الانترنت والكمبيوتر



فكرت وايد شنو يعني واسنتنتجت ان فعلا هالدكتوره ذكيه


الصداقه شي


والاصدقاء شي اخر


لكن منو بالضبط الانترنت ومنو الكمبيوتر فيهم


عشان جذي بكتب موضوع عن مفهوم الصداقه والصديق




هناك مفاهيم كثيرة للصداقه ..... ولكنها في طريق التغير ....



وفي ايضا واحد كاتب تساؤلات عن الصداقه

وقال


نظرا لاهمية هذا الموضوع قمت بفتح باب النقاش فيه هنا وارجو منكم التفاعل مع الموضوع بابداء الاراء ووجهات النظر بصراحة لتعم الفائدة للجميع.في حياتنا اليومية حين نُسأل عن رفيق غالبا يكون الجواب

(هذا فلان صديقي)

لكن هل فلان هذا فعلا يحمل معنى الصداقة الحقيقي ام هي كلمة اصبحت تستخدم في غير محلها؟؟

ما مفهومك الشخصي عن الصداقة؟؟

هل تعتقد بوجود فرق بين الصاحب والصديق؟

وان كان هناك فرق فما هو؟

هل تتخذ اي شخص صديق ام هناك اسس وقواعد لذلك؟

وان كانت هناك اسس وقواعد فما هي؟

هل تولي ثقتك الكاملة لصديقك ام تعطيه جزء منها؟ولماذا؟

هل هناك عدد معين من الاصدقاء يجب التوقف عنده؟ ولماذا؟

من برأيك اقرب الصديق ام الاخ؟ ولماذا؟

هل تجعل صديقك في اختبار دائم ام تحدد وقت لذلك ؟

حين تتعرض لخيانة الصديق فعلى من تلقي اللوم عليه ام على نفسك ام على من؟


انا بجاوب على الاسئله وانتو بعد قولو رايكم



انا اقول بالنسبه للسؤال الاول :

هل اصبحت كلمه الصداقه في غير محلها : انا اقول نعم وايد اقول هذا صديقي ولكن ما يحمل ابدا معنى الصداقه مجرد صار مسمى لان في مفاهيمنا مافي غير كلمة صديق الي متعودين عليها


لكن هل هو صديقي بمعنى الكلمه انا اقول لأ

والسؤال الثاني شنو مفهومي عن الصداقة

انا اقول ان الصداقه هي فعلا حب لاخيك ما تحب لنفسك

والصداقه حب الخير للاخر

الصداقه اخلاص واخلاق وامانه وصدق

انا اقول اي في فرق بين الصاحب والصديق لصاحب اهوا الي اصاحبه لوقت معين

والصداقه معنى اكبر من ان تكون مؤقته

اما اختياري لاصدقائي فأنا ماعندي شروط صراحه احب اكون صديقه حق الي يبيني صديقته واهم ما علي اني انا اطبق شروط الصداقه

وانا اتعودت اني اعطي ثقة كامله لاصدقائي بس هذا غلط المفروض اني احذر اكثر واكثر لان مو الكل يحملون صفات الصديق بمعنى الكلمه

وهالسؤال وايد مهم منو اقرب الصديق ام الاخ

انا اقول على حسب ولكن اعطي الاحقيه الكبيره الى الاخ لان الاخ يفهم اخوه وعايش معاه طول عمره ويخاف عليه اكثرمن الصديق وبعدين الاخ واضح جدا امام اخوه والكل عارف الثاني


وانا لو تبون الصراحه خواتي اهما صديقاتي انا اقول ان الاخ اقرب لانه يحمل اكثر من معنى ليس مجرد اخ ولكن ممكن يكون صديق

وانا صراحه ماحب اختبر اصدقائي تاركه الزمن يختربهم

وحين اتلقى خيانه من صديق الوم نفسي وصديقي



اذا الموضوع كان يهمكم جاوبو على الاسئله الي تقدرون عليها



ثانكيوو




تحية خاصه : تحياتي لج دكتوره فوزيه الدريع


Friday, November 2, 2007

الشعر .. نقطة ضعفي

فعلا ... يستحق الشاعر كلمة ( صح لسانك) ولو في كلمة أكبر من جذي جان قلناها وكرمناه فيها
يالله شنو احب الشعر الي يحمل معاني تأثر فيني يالله هالشعر شلون الله وهبه حق ناس وصاروا موهبين فيه والله عجيب الانسان لما يكون شاعر ولما تحضره كلمات يستصعب حضورها على غيره هذي قدره جميله
مرات افكر اقول شلون قدر يجيب هالبيت شلون قدر هالشاعر يركبه وينسقه شنو هالمشاعر الي عنده وانا استهوي نوع من الشعر واهوا الي يحمل حكمه كل بيت فيه حكمه اعشق التفكير فيييه
واحب القوافي في الشعر لانها تعطيه حقه سواءا كان الشعر بالغة العربيه او العاميه
ونتقد نوع معين من الشعر واهوا النثر مادري امل منه اهوا صج يحمل مشاعر ولكن ما تأثر فيني
على يوم بنقل لكم اشعار جميله وافرق بين انواع الشعر وكل ما يتعلق بالشعر

Thursday, November 1, 2007

بسم الله الرحمن الرحيم

مدونتي جديده
تعودت اقول كل شي بصراحه من غير مجامله اتمنى ما اضايق احد بصراحتي وبرايي واتمنى حريتي ما تتعدا حرية اي انسان وتزعله وتضايقه مثل ما نعرف ان الاراء تختلف وكل شخص عنده وجهة نظر والمميز من يقنع الاخرين ويخليهم يواجهون الموضوع من منظوره والمميز الاخر من يحاول يصحح وجهة نظره الخاطئه
مثل ما يقول المثل
الاختلاف بالراي لا يفسد من الود قضية
وشكرا